Актыўна ідзе галасаванне на ўчастку №62, які знаходзіцца ў беларускамоўнай гімназіі №2. Выбаршчыкі прыходзяць сем’ямі, з дзецьмі, галасуюць паасобку.
У фае ўстановы адукацыі змешчана шмат актыўнасцяў. У іх ліку выстава малюнкаў вучняў, сярод якіх можна выбраць лепшы; таксама ёсць магчымасць паўдзельнічаць у віктарыне ці майстар-класе, змерыць ціск і прадэгуставаць прысмакі. З актавай залы даносіцца музыка – ідзе канцэрт, і можна далучыцца да прагляду.
Сярод выбаршчыкаў – маладая медработніца Насця Хацкевіч.
– Вучылася тут. Прыемна бачыць тых, хто таксама прыйшоў паўдзельнічаць у важнай для ўсёй краіны падзеі. Выбіраць кіраўніка дзяржавы – адказная місія. І трэба ставіцца да свайго выбару сур’езна. Удзельнічаць у галасаванні абавязкова павінна і моладзь. Нам жыць у гэтай краіне, развіваць яе. І таму кожнаму з нас трэба зрабіць правільны выбар. Я выбіраю мір і шчаслівую будучыню для сябе і сваёй сям’і.
З маленькім сынком Цімафеем прыйшла на ўчастак для галасавання Карына Мазанік. Маладая жанчына аддала свой голас за мір. Гэта асабліва важна ў сучасных рэаліях. І за стабільнасць у краіне.
– Мне падабаецца тое, что ў Беларусі спакойна. Хай так будзе і далей, – сказала барысаўчанка.
Старшыня ўчастковай камісіі адзначыў, што ўчора на ўчастку працавалі міжнародныя назіральнікі ад Садружнасці Незалежных Дзяржаў. Цікавіліся, як праходзіла датэрміновае галасаванне, гутарылі з мясцовымі назіральнікамі. Пільная ўвага надзялялася арганізацыі галасавання. Вынік работы станоўчы.
Таццяна САКОВІЧ, фота Юрыя АБРОСЬКІНА
