З надыходам вясны аграрыі раёна не спяць у шапку, а рупліва рыхтуюцца да пасяўной кампаніі. Больш падрабязна пра гэта нам паведаміў начальнік аддзела раслінаводства ўпраўлення па сельскай гаспадарцы і харчаванню Барысаўскага райвыканкама Яўген Лапыцько.

– Якім чынам зімовае надвор’е аказала ўплыў на тактыку вясенне-палявых работ?

– Надвор’е 2022 года абумовіла неабходнасць пэўнай карэкціроўкі тэрмінаў правя­дзення сельскагаспадарчых работ. Гэта датычыцца і своечасовага закрыцця вільгаці на лёгкіх па грануламетрычнаму складу глебах, і дробнай падкормкі азотнымі ўгнаеннямі азімых культур.

– Якімі тэмпамі ідзе пад­рыхтоўка?

– Зараз гаспадаркі раёна зай­маюцца назапашваннем мінеральных угнаенняў, прапрацоўваюць механізмы закупкі запчастак, паліўна-змазачных матэрыялаў. Тэхніка выстаўляецца на лінейку гатоўнасці. Надвор’е паўплывала на тое, што сяўба яравых зерневых культур можа пачацца раней, чым звычайна, – прыкладна 28 сакавіка. Сёлета на палі выйдзе дадатковая тэхніка: восем новых энерганасычаных трактароў “Беларус-3522” і дзве машыны тыпу “РАСА” для своечасовай падкормкі зерневых культур.

– Ці закуплялася замежнае насенне, рэчывы для апрацоўкі, неабходныя пры правядзенні пасяўных работ прыстасаванні? Або перавага аддаецца айчынным вытворцам?

– У бягучым годзе ўзнікла асцярога наконт набыцця гібрыдаў кукурузы з улікам таго, што ў асноўным аб’ёме імпартная селекцыя займае ў нас 80%. Зараз гэта пытанне фактычна вырашана дзякуючы своечасовай рабоце спецыялістаў сельскагас­падарчых прадпрыемстваў Барысаўшчыны. Недахоп аб’ёмаў з лёгкасцю перакрываецца айчыннымі вытворцамі. Зараз гас­падаркі праводзяць працэдуру закупкі сродкаў аховы. Як паказ­вае практыка, у гэтым накірунку праблем не ўзнікае.

– Ці ёсць у планах сяўба новых культур?

– Так. Экалагічная сельскагаспадарчая кампанія “Ганьсу-Бел” уключыла ў структуру сяўбы сою і сланечнік. Цалкам у раёне акцэнт будзе накіраваны на вырошчванне кукурузы на зерне. Сёлета пад дадзеную культуру адведзена 10900 га, або 47% ад агульнай плошчы яравой сяўбы.

– У які тэрмін плануецца завяршыць пасяўную?

– Згодна з рабочым планам сяўба ранніх яравых зерневых і зернебабовых культур будзе праводзіцца на працягу 10 дзён.

Гутарыла Таццяна САКОВІЧ

Like
Like Love Haha Wow Sad Angry