Сёння ў Цэнтральнай раённай бібліятэцы імя І.Х. Каладзеева, а дакладней у галерэі “Праменад”, размешчанай на другім паверсе будынка, адбылося адкрыцце цудоўнай фотавыставы Уладзіслава Цыдзіка «Бачу Беларусь такой», а таксама прэзентацыя кніг «Бачу Беларусь такой», «Мая Радзіма» і «Зачараваны Беларуссю». У іх сабраныя творы сучасных беларускіх паэтаў і празаікаў і фотаілюстрацыі майстра.

Уладзіслаў Цыдзік пачынаў працоўны шлях галоўным аграномам сельгасарганізацыі, працаваў у раённым упраўленні сельскай гаспадаркі, быў начальнікам упраўлення Мінсельгасхарча, старшынёй Камітэта дзяржаўнага кантролю Мінскай вобласці. Быў абраны дэпутатам Палаты прадстаўнікоў Нацыянальнага сходу Рэспублікі Беларусь пятага склікання. З’яўляецца аўтарам і сааўтарам 30 кніг і брашур.

— Фатаграфіяй я захапіўся ў дзяцінстве, у класе пятым, — расказвае фотамастак. — З таго часу фотаапарат з рук і не выпускаю. Маёй самай любімай «мадэллю» заўсёды была наша прырода, і сёння я рады падзяліцца з вамі сваёй творчасцю, сваім бачаннем роднай зямлі.

Дарэчы, першая выстава работ Уладзіслава Станіслававіча адбылася ў холе Палаты прадстаўнікоў Нацыянальнага сходу Рэспублікі Беларусь. Ён прызнаецца, што вельмі хваляваўся перад яе адкрыццём. Але дарэмна: фотаработы былі высока ацэнены, і выстава пачала змяняць лакацыі: ад залы ў Нацыянальнай бібліятэцы да музея гісторыі беларускай культуры, пабывала яна і за межамі нашай краіны…

Фотавыстава — гэта своеасаблівае прызнанне майстра ў любові да роднай зямлі. У яго аб’ектыў трапляюць не толькі фігуры і асобы. Уладзіслаў Цыдзік бачыць у прыродзе, розных аб’ектах і людзях тое галоўнае, істотнае, што дапамагае прадставіць нашу краіну ва ўсіх колерах і фарбах.

На адкрыццё выставы разам з Уладзіславам Цыдзікам прыехалі савецкі, беларускі і расійскі музыкант і кампазітар, заслужаны дзеяч культуры Беларускай ССР, народны артыст Беларусі Эдуард Ханок, член Саюзаў пісьменнікаў Расіі і Беларусі Андрэй Скарынкін, заслужаны журналіст Беларускага Саюза журналістаў, член Саюзаў пісьменнікаў Беларусі і Расіі першы намеснік старшыні Саюза пісьменнікаў Беларусі Алена Стэльмах.

 — Ужо выдадзена 4 кнігі з маімі працамі: «Зачараваныя Беларуссю», «Бачу Беларусь такой», «Малая Радзіма», «Прырода Беларусі», іх складальнікам выступіла Алена Стэльмах , — зазначыў Уладзіслаў Цыдзік. — За кожным маім здымкам, апублікаваным у кніжках, прадстаўленых на выставе, — свая гісторыя, сваё імгненне ў жыцці. Вось баравік падымае бервяно, або божая кароўка паўзе па тонкай былінцы… Памятаю, дзе і пры якіх абставінах зроблена кожнае фота!

Дарэчы, у кнізе «Бачу Беларусь такой» аўтар здымкаў разам з 65 беларускімі паэтамі выказвае свае шчырыя пачуцці да роднай зямлі. Кніга, як распавяла Алена Стэльмах, пабачыла свет у 2018 годзе ў выдавецкім доме «Звязда» і была выдадзена на трох мовах: беларускай, англійскай і рускай. У ёй паказаны разнастайныя куткі нашай краіны. Яна стала своеасаблівым працягам тэмы, распачатай у фотаальбоме “Зачараваны Беларуссю”.

— У нас сёння вельмі хвалюючы дзень, — расказала Алена Анатольеўна. — Мы ведалі, што нас чакаюць у культурнай сталіцы Беларусі 2021 года. Мы рады цёпламу прыёму. Нашаму праекту ўжо пяць гадоў. І досыць часта бывае так, што натхненне нейкай працай, кнігай праходзіць, пакідае. Але цікавасць да гэтага праекта не толькі не згасла, а стала яшчэ большая. Вы змаглі ўбачыць на выставе, наколькі маляўнічая наша краіна. Прапануем пераканаецца і ў тым, што не толькі фотамайстар, але і майстры словы могуць перадаць любоў і прыгажосць роднай зямлі!

Напрыканцы сустрэчы сваёй творчасцю з удзельнікамі і наведвальнікамі выставы падзяліліся Андрэй Скарынкін і Эдуард Ханок. Яны прыгадалі розныя цікавыя выпадкі з жыцця, спявалі, чыталі вершы.

Удзельнікі выставы з задавальненнем падпявалі Эдуарду Сяменавічу ўлюбёныя хіты «Малиновка”, “Завіруха”, “Песенка первоклассника” і іншыя.

А вам цікава даведацца, якой бачыць нашу краіну Уладзіслаў Цыдзік скрозь аб’ектыў свайго фотаапарата? Тады абавязкова наведайце выставу «Бачу Беларусь такой”!

Вольга ЦЫБУЛЬКА, фота Юрыя АБРОСЬКІНА

image_pdfimage_print
Like
Like Love Haha Wow Sad Angry